logo
ENG



კლუბ "მტკვარზე"-ს დამფუძნებელი: დღეს ჩატარდება ივენთები, დიდი ხანია იციან, რომ ვიხსნებოდით

17 დეკ 202118:41
3 წუთის საკითხავი
 
2021/12/17/fobprtq7k0wtwql.jpg

კლუბ "მტკვარზე"-ს დამფუძნებელი ქეთა გაბუნია გაბუნია წერს, რომ მთავრობამ დიდი ხანია იცის, რომ კლუბები 17-18 დეკემბერს იხსნებოდა. თუმცა, კლუბები საკოორდინაციო საბჭოსგან ღონისძიების გამართვისთვის დასტურს დღემდე ელოდნენ. გაბუნია წერს, რომ ამ დრომდე, დასტურის მიღება 2 -ჯერ, ჯანდაცვის მინისტრის ეკატერინე ტიკარაძის გადადგომისა და პრემიერმინისტრ ირაკლი ღარიბაშვილის მივლინების გამო გადაიდო. ქეთა გაბუნია შრომის ინსპექციის განცხადებას ეხმაურება, რომლის თანახმადაც, ღამის კლუბებში ღონისძიებების გამართვა ნებადართული არ არის.

ქეთა გაბუნია წერს, რომ კლუბები 2-წლიანი ლოდინის მერე დღეს იხსნებოდა და შრომის ინსპექციამ გადაწყვეტილება, უკვე დაგეგმილ ღონისძიებამდე რამდენიმე საათით ადრე გაასაჯაროვა.

"2-წლიანი ლოდინის მერე, ძლივს ვიხსნებოდით. იმის ფონზე, როცა ათასობით ადამიანს კრებენ მოედნებზე საახალწლო ღონისძიებებზე, თურმე კლუბები საფრთხის შემცველი ადგილები ვართ.

თვეებია მიდის კვლევები, გახსნის პროტოკოლის შემუშავება, წესების დადგენა და უსაფრთხო ივენთებისთვის მომზადება, რომ უბრალოდ არ გავნადგურდეთ და ახალი წლის პერიოდი მაინც გამოვიყენოთ ოდნავ გონზე მოსასვლელად.

აბსოლუტურად ყველა პუნქტი გავლილი და შეთანხმებულია, სავენტილაციო სისტემის ტექნიკური მახასიათებლებით დაწყებული, ტევადობის და შიგნით ოპერირების საკითხებით დამთავრებული."- ამბობს ქეთა გაბუნია.

შრომის ინსპექციის ინფორმაციით, ღამის კლუბებში ღონისძიებების გამართვა ნებადართული არ არის. ამ დრომდე ცნობილი იყო, რომ ღამის კლუბები მუშაობას 17 დეკებერს განაახლებდნენ. როგორც უწყების განცხადებაშია ნათქვამი, შრომის ინსპექცია სხვა პასუხისმგებელ უწყებებთან ერთად კორონავირუსის პანდემიის ფონზე მუშაობენ უსაფრთხოების პროტოკოლზე, რომელიც საკოორდინაციო საბჭოსთვის წარდგენილი ჯერ არაა. 

ცნობისთვის, რამდენიმე თვეა, საკლუბო ინდუსტრია გახსნასთან დაკავშირებით მთავრობასთან მოლაპარაკებებს აწარმოებს. ინდუსტრიის წარმომადგენლები აცხადებენ, რომ მძიმე ფინანსური პრობლემები აქვთ და გახსნა აუცილებელია. 

შრომის ინსპექციამ ხიდი 3 დეკემბერს დააჯარიმა, დალუქვის შესახებ ბრძანება გასცა და ხიდს გონივრული ვადა მისცა კლუბის დასატოვებლად. მოგვიანებით ხიდმა გაავრცელა განცხადება, რომ ამ ეტაპზე კლუბს ტოვებდნენ და პასუხისმგებელ პირებს "გონივრულ ვადას" აძლევდნენ, რომ კლუბის მუშაობა დაეშვათ.

ასევე, შრომის ინსპექციამ 4 დეკემბერს გაავრცელა განცხადება, რომ მოუწოდებენ ღამის კლუბებს არ განახორციელონ აკრძალული საქმიანობები, წინააღმდეგ შემთხვევაში, ობიექტების მიმართ გამოყენებული იქნება შესაბამისი ადმინისტრაციული სახდელი, ჯარიმისა თუ დალუქვის სახით.

პროფესიული კავშირების თავმჯდომარე ირაკლი პეტრიაშვილი ამბობს, რომ საკლუბო სექტორში დაახლოებით 8 000 ადამიანია დასაქმებული და ისინი 21 თვეა შემოსავლის გარეშე დარჩნენ. პეტრიაშვილის თქმით, მიმდინარეობდა კონსულტაციები კლუბების ასოციაციასთან და ყველა პარამეტრებით, 20 დეკემბრამდე უნდა განხორციელებულიყო რეგულაციები, რომლის შედეგად უნდა მოხერხებულიყო კლუბის ისე ამუშავება, რომ ადამიანები ყოფილიყვნენ დაცულად. პეტრიაშვილის თქმით, სრულად გაუგებარია შრომის ინსპექციის გადაწყვეტილება.

აღსანიშნავია, რომ დღეს თბილისის რამდენიმე ღამის კლუბში გასართობი ღონისძიებაა ჩანიშნული. 

 

close დახურვა